Музички Вести

„This Is America“ на Чајлдиш Гамбино – највпечатливо видео за 2018 г

Кога се прави преглед на најинтересните моменти на музички план во 2018та година, неизбежно е да се каже – наградата за највпечатливо видео оди кај This Is America на Чајлдиш Гамбино.

Во текот на изминатата година актерот Доналд Гловер беше доста актуелен. Се појави како водител на популарното американско ТВ шоу Saturday Night Live и себеси се претстави како „актер, сценарист и пејач“, што е сосема точно. Сепак, тој заборави да спомне уште еден од своите таленти, кој го прави повеќе од забавувач.

Доналд Гловер, или Чајлдиш Гамбино, како што се нарекува кога настапува како поп-рап музичар, во 2018та се покажа пред се како уметник. Со видеото за американскиот бр.1 хит „This Is America“ покажа дека е од рангот на уметниците чии дела треба да се прегледуваат и да се коментира нивното значење. Зошто? Затоа што видеото претставува моќен алегоричен портрет на Америка во 21 век.

Во случај да доаѓате од друга планета, еве го појаснувањето – „This Is America“ е песна од Доналд Гловер/Чајлдиш Гамбино, која ја објави некаде кон среината на изминатата 2018та година, истовремено со видеото режирано од Хиро Мураи, со кого соработува на комичната ТВ серија „Атланта“. Видеото содржи експлицитно насилство, поради што е несоодветно за деца, а веројатно неприфатливо и за некои возрасни.

Меѓу темите што се опфатени се расизмот, екстремното насилство против Афро-американците и игнорантскиот однос на американското општество кон овие проблеми.

Видеото оваа година беше погледнато од милиони луѓе, искоментирано скоро од сите, па и од весниците, од најсериозните, како Њујоркер, до најтаблоидните како The Sun.

„This Is America“ не е совршено видео, ниту пак е за сечиј вкус. За едни е премногу заплеткано, за други пренасилно, а некои го гледаат како хипокритично. Но и тие карактеристики се дел од уметноста.

Видеото во текот на 2018та стана вистински феномен на сите интернет платформи. Со воодушевување преку социјалните мрежи реагираше и светскиот џет-сет. „Што се случува кога креативноста ќе дојде во рацете на уметник,“ напиша актерот Винстон Дјук, ѕвезда на филмот „Црниот пантер“. Адел на својот роденденски пост напиша: „ПС Чајлдиш Гамбино, како ли само имаш време да ни понудиш толку многу добрини во разни области. Те обожувам.“

Ако популарноста на едно видео се мери со тоа колку пародии се направени и прикачени на Јутјуб, тогаш може да се каже дека „This Is America“ котира доста високо. Најпопуларна верзија од оние што се појавија во текот на 2018та е таа на нигерискиот рапер и актер Фалц (Falz), насловена „This Is Nigeria“. Но тој не е единствен. Свои изведби во текот на годината направија и Јапонци, Канаѓани, Корејци, па дури и Ваканданци. Сосема доволно за „This Is America“ на Чајлдиш Гамбино да го прогласиме за вистински културен феномен на 2018та година.

25.12.2018
Музички времеплов
  • 1994 - Stone Temple Pilots започнуваат 4-неделен престој на првото место на американската албумска листа со 'Purple'.
  • 2000 - USА No.1 Enrique Iglesias 'Be With You'
  • 1967 - 40 милиони луѓе ја следат изведбата на Beatles на 'All You Need Is Love' во живо преку сателит како дел од глобалниот ТВ линк 'Our World'. Mick Jagger, Keith Richards, Eric Clapton, Graham Nash, Keith Moon и Gary Leeds ги пеат придружните вокали.
  • 1939 - Роден е соул пејачот Harold Melvin (1972 USА No.3 & 1974 UK No.9 'If You Don't Know Me By Know').
  • 1954 - Роден е David Paich, воклаист и клавијатурист во Toto (1983 USА No.1 & UK No.3 'Africa').
  • Повеќе
Фреквенции
Скопје