Adele е крунисана во кралица на Британските музички награди кои се одржаа во средата навечер во лондонската O2 арена. Таа освои 4 награди, меѓу кои Најдобар британски женски изведувач, Најдобар британски сингл и Најдобар британски албум.
Ѕвездата, која го затвори шоуто изведувајќи ја нумерата “When We Were Young” исто така ја доби наградата за Глобален успех. Таа сега се изедначи со британскиот бенд Blur по бројот на освоени награди во една вечер. One Direction со наградата за Најдобар британски спот и оневозможија да ја освои петтата награда и да постави нов рекорд.
Аdele, примајќи една од наградите, ја искористи можноста да искаже поддршка до Kesha која иако го обвини продуцентот Dr. Luke за сексуално и емоционално злоставување, согласно судската одлука ќе мора да продолжи да издава музика за компанијата Sony во која работи и тој.
Британскиот рок бенд Coldplay сега може да се пофали со девет трофеи на Британските музички награди, освојувајќи ја четвртата статуетка во категоријата Најдобар британски бенд, со што станаа и најуспешната британска група во историјата на Brit Awards.
Во рамките на церемонијата видовме и емотивен омаж посветен на David Bowie предводен од Annie Lennox и неговиот добар пријател актерот Gary Oldman. Lennox го нарече Bowie, кој почина минатиот месец од рак, влијателен визонер. Примајќи ја наградата Brits икона во името на Bowie, Oldman рече: “David ти беше смртен, но твојот потенцијал беше натчовечен, а твојата музика живее и понатаму.“
Австралиската ѕвезда Lorde, која Bowie своевремено ја нарече иднината на музиката, во придружба на музичарите кои со децении работеа со Bowie, достојно, моќно и со голема почит ја изведоа неговата култна класика “Life on Mars”. Изведбата беше дочекана со одобрување и од синот на Bowie, режисерот Duncan Jones.
Brit Awards беа отворени од Coldplay кои пружија весела, калеидоскопска изведба на “Hymn for the Weekend”.
Меѓу впечатливите изведби беа оние на Rihanna и Drake со “Work”, а нивното симулирање секс на сцената беше најфотографираниот момент на вечерта. Јustin Bieber најпрвин настапи со акустична изведба на “Love Youself” придружен на гитара од James Bay, a потоа придружен со оган и танчери ја изведе “Sorry”. Неговиот настап му донесе позитивни коментари на Твитер од страна на неговите колеги.
На Британските музички награди настапија уште Jess Glynne, James Bay, Little Mix.
Листа на награди:
Најдобар британски машки соло изведувач – James Bay
Најдобар британски женски изведувач – Adele
Најдобра британска група – Coldplay
Најдобар британски нов изведувач – Catfish & The Bottlemen
Најдобар британски продуцент – Charlie Andrew
Најдобар британски албум – Adele, “25”
Најдобар британски сингл – Adele, “Hello”
Најдобар британски спот – One Direction, “Drag Me Down”
Најдобар интернационален машки изведувач – Justin Bieber
Најдобар интернационален женски изведувач – Bjork
Најдобра интернационална група – Tame Impala
Critic’s Choice – Jack Garratt
Глобален успех – Adele
BRIT икона – David Bowie
25.02.2016