Американскиот рапер Lil Wayne замина на отслужување на затворската казна, откако после неколку одложувања во њујоршкиот суд беше изречена пресудата против него.

27-годишниот рапер, роден како Dwayne Carter, се изјасни виновен на обвинението за поседување оружје, покренато после инцидентот во 2007 година, кога беше откриено огнено оружје во автобусот со кој беше на турнеја. Тој е осуден на една година затвор.

Судијата Charles Solomon ја изрече пресудата како резултат на спогодбата со која раперот се откажа од правото на жалбена постапка.

Изрекувањето на пресудата беше двапати одложувано – еднаш поради дентална интервенција,а вториот пат поради пожарот кој избувна во зградата на судот.

Веднаш по изрекувањето на пресудата Lil Wayne беше однесен во Rikers Island затворот. Најрано би можел да биде ослободен дури за осум месеци, врз основа на добро поведение.

Раперот напорно работеше до заминувањето во затвор, снимајќи девет музички спотови. Наедно, снимена е и серија во 6 дела, на mtv.com.”Road To Rikers” го прикажува раперот пред и после операцијата на забите, додека ги снима музичките спотови и се одмора во својот дом.   

Пред околу еден месец отвори свој профил на Twitter.