Холандскиот Eurosonic Noorderslag (ESNS), еден од најголемите и највлијателните европски фестивали и музички конференции, го најави своето издание во 2021 година со повеќе од 100 изведувачи и говорници. Поради пандемијата, новото издание на Јуросоник во целост ќе биде виртуелно, а ќе се одржи од 13 до 16 јануари. Во неговата 35-та година по ред ја продолжува својата мисија на промоција на нова европска музика.
SHOWCASE ПРОГРАМА
ESNS објави повеќе од 100 европски изведувачи кои ќе и се претстават на публиката, а избрани се од страна на самиот фестивал. Robert Meijerink, водител на ESNS програмата изјави: „Промовирањето на нови европски таленти секогаш било во центарот на Eurosonic и сведоци сме биле на многу изведувачи како Fontaines DC, Celeste, Christine & Queens, Stromae, Dua Lipa или IDLES кои продолжиле со успешна кариера по претставувањето на нашиот настан”.
На новото издание ќе има изведувачи од 28 европски земји кои покриваат различни жанрови - од рок, поп и џез до електронска музика и хип хоп. Меѓу изведувачите се најдоа и неколку од нашиот регион. Србија ќе биде претставена од белградската група E-Play, а Словенија од AKA Neomi, Ana Kravanja & Samo Kutin и групата Etceteral. На листата се најдоа и Denise Chaila FlexFab & Ziller Bas, Hayes & Y, Jelani, Junior A, Anna Kaneelina, Banji, Chibi Ichigo, CloZee, Deaf Radio, Decolonize Your Mind Society. Комплетната листа може да се најде на официјалната фестивалска веб страница.
Виртуелното издание на ESNS во петок ги претставува настапите во рамките на Eurosonic и свеченото доделување на наградите Music Moves Europe Talent Awards. Во сабота во центарот на вниманието ќе бидат холандски таленти кога Noorderslag ги претставува најдобрите локални музички ѕвезди.
Showcase програмата на фестивалот ќе биде комплетно бесплатна, а за следење потребно е да се регистрирате на платформата www.esns.nl/tickets.
КОНФЕРЕНЦИЈА
Напредок и патот до опоравување ќе биде фокусот на конференцијата во рамките на ESNS, а ќе вклучува панел дискусии, еминентни говорници, можност за дружење и многу нова европска музика.
Сите сакаат да продолжат со работа и музика, а факт е дека уште некое време ќе бидеме во фаза на чекање. Како изгледа патот до опоравување на музичкиот сектор и кога повторно ќе може да продолжи? Дали стримингот е тука за да остане? Како пандемијата влијае на кантавторите и изведувачите? Што VR и AR ќе придонесат за нашето искуство во живо? Ова се дел од прашањата на кои ESNS ќе се обиде да ги даде своите размислувања во текот на конференцијата.
Своето учество веќе го потврдија важни актери од европската музичка сцена како Steve Strange (X-Ray Touring, агент на Queens of the Stone Age, Eminem и Coldplay), Tom Windish& Mike Malak (агенти на Paradigm Talent Agency чии клиенти се Billie Eilish, Diplo, Alt.J, Pusha T, Black Eyed Peas), Aly Gillan (Bandcamp), Anita Barisic (Warner Chappell), Claire O’Neill (A Greener Festival), Helen Sildna (Tallinn Music Week), Keith Harris (Keith Harris Music Ltd), Michael Chugg (Michael Chugg Entertainment), Michal Kascak (Pohoda Festival), Sammy Andrews (Deviate Digital), Scott Cohen (Warner Music) и многу други.
За време на ESNS потврдени се и состаноци со членовите на Yourope и Seminar кои ќе бидат посветени на здравјето и сигурноста. Европското здружение на композитори и текстописци (ECSA) ќе се осврне на бизнис моделите и начинот на кој ќе може да се направи "ланец на фер музички вредности" во панел дискусијата во која ќе учествуваат Romeijn (од BAM! Popauteurs), Arriën Molema (член на ECSA и кантавтор), Helen Smith (IMPALA) и Annabella Coldrick (MMF).
Пријавувањето за ESNS е 50 евра. Повеќе информации може да најдете на официјалната веб страна на Eurosonic Noorderslag.
За ESNS
ESNS (Eurosonic Noorderslag) се организира веќе 35 години во холандскиот град Groningen и претставува главно случување за промовирање на идни музички таленти. Со своето докажано искуство помага во создавање на нови изведувачи на меѓународната музичка сцена. ESNS се состои од концертна и конференциска програма со бројни можности за вмрежување и поврзување. Настанот привлекува делегати од сите делови на забавната индустрија, вклучително и претставници од повеќе од 400 фестивали. Новото издание во 2021 година ќе биде виртуелно со фокус на новата европска музика.
09.12.2020