20.02.2019 20:00 - 20.02.2019 23:30
На 20 февруари 2019, во О2 Арената во Лондон, се одржа 39-тото издание на Британските музички награди. Втора година по ред водител на манифестацијата е британскиот актер и комичар Jack Whitehall.
Меѓу презентерите беа Paloma Faith, Annie Mac, Suki Waterhouse, Khalid, Jared Leto, Liam Payne. Како изведувачи настапија 1975, Pink, George Ezra, Hugh Jackman, Pink, Little Mix & Ms Banks, Jorja Smith & H.E.R., Jess Glynne, Calvin Harris & Dua Lipa, Sam Smith и Rag’n’Bone Man.
Големите победници на вечерта, со по две награди, беа Calvin Harris и The 1975. Шкотскиот диџеј и продуцент, по 16 номинации во минатото, конечно се закити со награди (за Најдобар британски продуцент и Најдобар британски сингл, за соработката со Dua Lipa, “One Kiss”). The 1975 ги освоија наградите за Најдобра британска група и Најдобар британски албум.
Наградата за Глобален успех втора година по ред му беше доделена на Ed Sheeran поради феноменалниот успех на неговиот последен албум “÷“, продаден во тираж од над 10 милиони примероци.
Во рамките на манифестацијата беа доделени 14 статуетки дизајнирани од познатиот архитект сер David Adjaye кого го сметаат за водечки архитект на својата генерација. За Брит статуата тој соработуваше со чешката иновативна дизајнерска компанија Lasvit за да создаде навистина уникатна статуа за секој БРИТ победник.
Шоуто беше отворено со настап на австралискиот актер Hugh Jackman и специјална изведба од глобалниот музички феномен “The Greatest Showman” чиј саундтрак 11 недели беше на врвот на британската албумска листа. Во изведбата на “The Greatest Show” на сцената беше придружен од над 100 танчери.
Крајот беше резервиран за Pink, првиот интернационален добитник на наградата за Особен придонес кон музиката. Американската ѕвезда изведе медли од своите хитови, потпомогната од Dan Smith од Bastille.
Calvin Harris го имаше своето деби на Британските музички награди како изведувач. За оваа посебна пригода тој се потруди да има настап за кој долго ќе се зборува бидејќи на сцената беше придружен од три големи британски ѕвезди и БРИТ добитници – Dua Lipa, Sam Smith и Rag’n’Bone Man со кои ги изведе заедничките хитови – “One Kiss”, “Promises” и “Giant”.
Jess Glynne настапи заедно со американската р&б ѕвезда од новата генерација, талентираната H.E.R. која неодамна доби 2 Греми награди. Обете соработуваа на ремиксот на најновиот сингл на Jess Glynne, “Thursday” кој беше изведен вечерта на наградите.
Little Mix на MTV EMA во Билбао настапија заедно со Nicki Minaj, a на Британските музички награди сцената ја делеа со Ms Banks, раперка од јужен Лондон, за изведбата на “Woman Like Me”.
Jorja Smith, минатогодишната добитничка на Critic’s Choice наградата, ја изведе “Don’t Watch Me Cry”, а наедно беше прогласена и за Најдобар британски женски изведувач.
George Ezra го изведе бр.1 синглот “Shotgun”, а The 1975 се претставија со "Sincerity Is Scary".
Непосредно пред Британските музички награди се одржа музичката недела, како поддршка за хуманитарната организација War Child, а во рамките на која беа организирани концерти на Jake Bugg, Tom Odell, Mabel, IDLES, Tom Walker, Anne-Marie.
Во рамките на оваа недела настапија голем број познати музичари на различни локации низ Лондон и Манчестер во периодот од 11 до 22 февруари, а собраните средства се наменети за децата чии животи се разрушени поради војната. Минатата година oрганизацијата War Child преку БРИТ музичката недела собра 650.000 фунти
Листа на награди
Најдобар британски машки изведувач: George Ezra
Најдобар британски женски изведувач: Jorja Smith
Најдобра британска група: The 1975
Најдобар британски нов изведувач: Tom Walker
Најдобра интернационална група: The Carters
Најдобар интернационален машки изведувач: Drake
Најдобар интернационален женски изведувач: Ariana Grande
Глобален успех: Ed Sheeran
Најдобар британски спот: Little Mix ft Nicki Minaj - Woman Like Me
Најдобар британски продуцент: Calvin Harris
Најдобар британски сингл: Calvin Harris & Dua Lipa - One Kiss
Најдобар британски албум: The 1975 - A Brief Inquiry into Online Relationships
Особен придонес кон музиката: P!nk
Critics’ Choice: Sam Fender